අගවිනිසුරු ඉවත් කර ඇත්තේ ව්‍යවස්ථා විරෝධී ලෙසයි

ශ්‍රේෂ්ඨාධිකරණය සහ අභියාචනාධිකරණය අගවිනිසුරුවරියට එරෙහි දෝෂාභියෝග ක්‍රියාදාමය පිළිබඳව පැහැදිලි නඩු තීන්දු ලබා දී තිබියදීත් අගවිනිසුරුවරිය ඉවත් කිරීමට කටයුතු කර ඇත්තේ ආණ්ඩුක්‍රම ව්‍යවස්ථා විරෝධී ආකාරයට යැයි ජනාධිපති නීතිඥ ජයම්පති වික්‍රමරත්න මහතාපවසයි. නව අගවිනිසුරුවරයා ධූරයට පත් කළහොත් එම පත්කිරීමේ ක්‍රියාවිලිය සම්බන්ධයෙන් ජනාධිපතිවරයාට එරෙහිව නඩු පැවරිය නොහැකි වුවත් නීති විරෝධී ක්‍රියාවකින් යම් පුද්ගලයෙක් එම ධූරයට පත් වූවහොත් එම පුද්ගලයා අගවිනිසුරු ධූරය දැරීම අභියෝගයට ලක්කළ හැකි බවද ඒ මහතා පැවසීය. යම්කිසි පොදු තනතුරකට සුදුසුකම් නොමැති තැනැත්තෙක් නීති විරෝධී ආකාරයෙන් පත්කළ හොත් ඒ සඳහා ක්වෝ වොරන්ටෝ ආඥාවක් ලබා ගැනීමට සාමාන්‍ය ජනතාව සඳහා හැකියාව ඇති බවද ඒ මහතා අවධාරණය කළේය. එසේම දෝෂාභියෝග ක්‍රියාදාමයේ දී පාර්ලිමේන්තුවේ උත්තරීත්තරභාවය නොසලකා තීන්දු ලබා දුන්නා යැයි කියමින් කිසිදු විනිසුරුවරයෙක් පාර්ලිමේන්තුවට ගෙන්වා ඔවුන්ට විරුද්ධව කටයුතු කිරීමේ ප්‍රතිපාදනයක් ආණ්ඩු ක්‍රම ව්‍යවස්ථාවේ නැතැයි ද ඒ මහතා කීය. වික්‍රමරත්න මහතා මෙම අදහස් දැක්වූයේ අද (14) පැවති ප්‍රවෘත්ති සාකච්ඡාවේදී පැවසීය.අගවිනිසුරු ශිරාණි බණ්ඩාරනායක මහත්මියට එරෙහිව ක්‍රියාත්මක කරන නීති විරෝධි ක්‍රියා හෙළා දකින් බවත්, ඊට එරෙහි නීති ක්‍රියා මාර්ගයකට පිවිසෙන් බවත් ‘නීති එකමුතුව’ සංවිධානය කියයි. අද (14) පෙරවරුවේ කොළඹ නිපෝන් හෝටලයේ එම සංවිධානය විසින් පවත්වන ලද පුවත්පත් සාකච්ජාවකදී මේ බව අනාවරණය කෙරිණ. මෙහිදී ජනාධිපති නීතිඥ ජයම්පති වික්‍රමරත්න මහතා පවසා සිටියේ නව අගවිනිසුරුවරයකු පත් කිරීම නීති විරෝධි බවයි. මෙම පුවත්පත් සාකච්ඡාවට ජනාධිපති නීතිඥ ශ්‍රීනාත් පෙරේරා, නීතිඥ ජේ.සී.වැලිඇමුණ යන මහත්වරුන් ඇතුළු තවත් නීතිවේදීන් කිහිප දෙනෙක් ද සහභාගී වූහ.