“ගොළු හදවත” සදහටම ගොළු වෙයි

ප්‍රවීණ චිත්‍රපට, වේදිකා රංගන ශිල්පී වික්‍රම බෝගොඩ මහතා අද (15) අභාවප්‍රාප්ත විය. ගොළු හදවත, ගම්පෙරළිය, අහස් ගව්ව, බිනරමලී, කලියුගය, යුගාන්තය වැනි චිත්‍රපටවල ප්‍රතිභාපූර්ණ රංගනයක යෙදුනු ඔහු සුගතපාල ද සිල්වාගේ බෝඩිංකාරයෝ වේදිකා නාට්‍යයෙන් රංගන දිවිය ඇරඹීය. ගම්පෙරළිය’ චිත්‍රපටයේ තිස්සගේ චරිතය රඟපෑවේ බෝගොඩය. ‘ගම්පෙරළියේ’ පමණක් නොව එහි දෙවැනි කොටස වන ‘කලියුගයෙත්’ තෙවැනි කොටස වන ‘යුගාන්තයෙත්’ යන නවකතා - චිත්‍රපට තුනේම දක්නා ලැබෙන එකම චරිතය තිස්සය. යුග තුනකින් යුතු එම චරිත 3ම බෝගොඩ රඟපෑවේය.  1940 බදුල්ලේ උපන් දොන් වික්‍රම බෝගොඩ පාසල් තුනකින් අධ්‍යාපනය ලබා ඇත. ඒ මහනුවර ධර්මරාජ, කොළඹ ආනන්ද හා පන්නිපිටිය ධර්මපාල යන විදුහල් වෙතිනි. බෝගොඩ රංගනයට අවතීර්ණ වූයේ ධර්මපාල වේදිකාවෙනි. ඒ එම විදුහල නිපද වූ ෂේක්ෂ්පියර්ගේ ‘මර්චන්ට් ඔෆ් වෙනිස්’ නාට්‍යයේ ඉංග්‍රීසි නිෂ්පාදනයක ෂයිලොක්ගේ චරිතය රඟපාමින් ය. ‘බෝඩිංකාරයෝ’ නාට්‍යයේ බෝගොඩ රඟපෑවේ වීරසේකරගේ චරිතයයි. බෝඩිංකාරයන්ගෙන් පසු වික්‍රම බෝගොඩ තවත් නාට්‍ය ගණනාවකම රඟපෑවේය. ‘රන්තෝඩු’, ‘වහලක් නැති ගෙයක්’, ‘තට්ටු ගෙවල්’, ‘වගුරු බිම’, ‘ඔන්න බබෝ ඇතින්නියා’, ‘තාත්තා’, ‘හෙලේ නැග්ග ඩෝං පුතා’, ‘නිල් කට්රොල් මල්’, ‘නැට්ටුක්කාරි’, ‘තුරඟ සන්නිය’ ඉන් කීපයකි. ඔහු පසු කලෙක ‘කැලණි පාලම’ නාට්‍යයේ කළ රංගනය ද විශේෂයෙන් සඳහන් කළ යුත්තකි. ‘ගම්පෙරළියෙන්’ පසු බෝගොඩ ආචාර්ය ලෙස්ටර් ජේම්ස් පීරිස්ගේ ‘දෙලොවක් අතර’ චිත්‍රපටයේ රඟපෑවේය. ඒ ශිරාණි (ජීවරාණි කුරුකුලසූරියගේ) සොහොයුරු සරත්ගේ චරිතයයි. එහෙත් මේ චිත්‍රපටයේ පසු සංස්කරණයකදී බෝගොඩ පෙනී සිටි ජවනිකා සියල්ල ඉවත් කර ඇත. දැනට අපට දක්නට ලැබෙන ‘දෙලොවක් අතර’ චිත්‍රපටයේ ඔහුගේ දර්ශන කිසිවක් ඇතුළත් නොවේ. ශ්‍රී ලංකාවේ නිෂ්පාදිත ප්‍රථම සිනමාස්කෝප් සිංහල චිත්‍රපටය ලෙස හැඳින් විය හැකි ඩී. බී. නිහාල්සිංහගේ ‘කෙටි කතාව’ චිත්‍රපටයේ ප්‍රධාන චරිතය රඟපෑවේ බෝගොඩය. (පැය භාගයක ධාවන කාලයකින් යුතු මේ සිනමා පටය ‘කහ බළල්ලු’ නමින් සිංහල දෙබස් කැවූ ‘ත්‍රී යෙලෝ කැට්ස්’ චිත්‍රපටයත් සමඟ ප්‍රදර්ශනය වූවේය). වික්‍රම බෝගොඩගේ සුවිශේෂම රඟපෑම ලෙස සැලකිය හැක්කේ ආචාර්ය ලෙස්ටර්ගේම ‘ගොළු හදවත’ චිත්‍රපටයේ ඔහු සුගත් වීරසේකර ලෙස කළ චරිතාංග නිරූපණයයි. එම රංගනය අදත් පැරැනි චිත්‍රපට ලොලීන්ගේ මතකයේ ති‍බේ. පන්නිපිටිය, පරණ පාරේ අංක 49, දරණ නිවසෙහි දේහය තැන්පත් කර ඇති අතර අවමගුල් කටයුතු පිළිබඳ විස්තර පසුව දැනුම් දෙන ලැබේ.