සා.පෙළට පෙනී සිටි 174160ක් උසස් පෙළට සුදුසුකම් ලබති

දෙදහස් දොළහ අධ්‍යයන ‍පොදු සහතික පත්‍ර සාමාන්‍ය පෙළ විභාගයට පෙනී සිටි සිසුන්ගෙන් 174160 දෙනෙකු උසස් පෙළ සඳහා සුදුසුකම් ලබා ඇත. ඒ අනුව පසුගිය 2011 වසරට වඩා වැඩි ප්‍රතිශතයක් මෙවර උසස් පෙළට සුදුසුකම් ලබා තිබේ. 2011 දී 60.80ක් උසස් පෙළ සඳහා සුදුසුකම් ලබා ඇති අතර මෙවර එම ප්‍රතිශතය 64.74 දක්වා ඉහළ ගොස් ඇත.
2012 සාමාන්‍ය පෙළ විභාගයට පෙනී සිටි 268995 අතුරින් විෂයන් 9 සඳහාම “ඒ” සාමාර්ථ ලැබූ ප්‍රතිශතය 1.68ක්ව ඇත. 2011 දී එම ප්‍රතිශතය 1.45 වී තිබිණි.
මේ අතර සියලුම විෂයන් අසමත් සංඛ්‍යාව 2011ට වඩා මෙවර අඩු වී තිබේ. 2011 දී 4.74 සියලුම විෂයන් අසමත් වූ අතර මෙවර එම අගය 4.13 ක් බවට පත්ව ඇත. ගණිතය විෂයට 267858 පෙනී සිට ඇති අතර සමත් ප්‍රතිශතය 55.35කි. විද්‍යාව විෂයට 268580 පෙනී සිට ඇති අතර ඉන් 68.26ක් සමත් වී ඇත.
මේ අතර 2012 ප්‍රතිඵල අනුව ඉංග්‍රීසි භාෂාවට 267987 පෙනී සිට ඇති අතර සමත් ප්‍රතිශතය 47.78කි. සිංහල භාෂාව හා සාහිත්‍ය 84.99කින් හා දෙමළ භාෂාව හා සාහිත්‍ය 77.35 ලෙස පෙනී සිටි සිසුන්ගෙන් සමත්ව ඇති බව විභාග දෙපාර්තමේන්තුව ඊයේ (05) නිවේදනය කළේය.