අවුරුද්දෙන් පසු කරන්ට් වදී

විදුලි ගාස්තු සංශෝධනය පිළිබඳ අවසන් තීරණය අලුත් අවුරුද්දෙන් පසු ලබාදීමට නියමිත බව මහජන උපයෝගිතා කොමිසම ආරංචි මාර්ග සඳහන් කරයි. යෝජිතව තිබූ සියයට  හැටක් පමණ වූ ගාස්තු  ඉහළ යාම සියයට විසිපහක් පමණ  දක්වා  අඩුවනු ඇතැයිද වාර්තාවේ. විශේෂයෙන්ම දැනට යෝජිත ගාස්තු ක්‍රමය යටතේ දැඩි අසාධාරණයට පත්ව සිටින ගෘහස්ථ පාරිභෝගිකයාට උපරිම සහනයක් ලැබෙන පරිදි  මෙම ගාස්තු සංශෝධනය ක්‍රියාවට නැංවෙනු ඇතැයි ද එම ආරංචි මාර්ග සඳහන් කරයි.
තම ගාස්තු සංශෝධන යෝජනාවට වැඩි පාරිභෝගික පිරිසකගේ විරෝධතාව  පළ වී තිබෙන නිසා අඩු ප්‍රතිශතයක් යටතේ වන සාධාරණ ගාස්තු  ක්‍රමයකට ලංකා විදුලිබල මණ්ඩලයේ අනුමැතිය  පළ වී තිබෙන බවද වාර්තා වේ.
ලංකා විදුලිබල මණ්ඩලය, එහි වෘත්තීය සමිති, වාණිජ මණ්ඩල, පාරිභෝගික සංගම්, බලශක්ති  විශේෂඥයන්, පෞද්ගලික  සමාගම් හා පාරිභෝගිකයන් ආදී සියලුම පාර්ශ්ව  නියෝජනය වන පරිදි ලිඛිත අදහස් හා යෝජනා  දෙසිය පනහක් පමණ මහජන උපයෝගිතා කොමිසම වෙත මේ වන විට ලැබි තිබේ.
ගාස්තු සංශෝධනයට ප්‍රථම පවත්වනු ලබන වාචික  අදහස් විමසීම  අද (04) කොළඹ පිහිටි  මහජන උපයෝගිතා කොමිසමේදී සිදුකරන අතර හැත්තෑවකට  අධික පිරිසක් එහිදී  සිය යෝජනා දත්ත හා තොරතුරු සහිතව ඉදිරිපත් කිරීමට නියමිත බව සඳහන් වේ.