නිල ඇඳුමට විද්ද අය ගැන සොයයි

කුරුණෑගල හින්දු - දෙමළ විදුහලේ දරු දැරියන් වෙත ලාබා දුන් පාසල් නිළ ඇඳුම් තොගයක් වංචා කිරීමට අදාල විදුහල්පතිනිය සහ උප ගුරුවරු දෙදෙනාට විරුද්ධව වයඹ පළාත් අධ්‍යාපන අධ්‍යක්ෂවරයා විසින් විනයානුකූලව පරික්ෂණයක් පවත්වන බව වයඹ ප්‍රධාන අමාත්‍ය නීතිඥ අතුළ විජේසිංහ මහතා වයඹ පළාත් සභා රැස්වීමේදී ප්‍රකාශ කළේය. ජනතා විමුක්ති පෙරමු‍ණේ වයඹ පළාත් සභා මන්ත්‍රී නිමල් හේරත් මහතා ඉදිරිපත් කර තිබූ ප්‍රශ්න යකට පිළිතුරු සභාගත කරමින් මේ බව ප්‍රධාන අමාත්‍ය වරයා ප්‍රකාශ කළේය. 2011 වර්ෂයේදී මෙම පාසල් නිළ ඇඳුම් වංචාව සිදුවී ඇති බව කරුණෑගල කළාප අධ්‍යාපන කාර්යාල මගින් සිදුකරණ ලද විමර්ශනයක දී විදුහල්පතිනිය උපගුරුවරුන් දෙදෙනෙකු අනාවරණය වී ඇති බව ප්‍රධාන අමාත්‍යවරයා ප්‍රකාශ කළේය. පාසල් නිළ ඇඳුම් රජයේ දේපලක් බැවින් ඒ පිළිබඳ කුරුණෑගල කළාප අධයාපන අධ්‍යක්ෂ කුරුණෑගල වංචා විමර්ශන අංශය එස්.සී.අයි.බී වෙත පැමිණිලි කළත් පොලිස් පරික්ෂණ මන්දගාමීව සිදුවූ නිසා නැති වූ නිළ ඇඳුම් සොයා ගැනීමට නොහැකි වී තිබේ. එම පාසල් නිළ ඇඳුම් රැගෙන යාම පිළිබඳව ගරුවරු සහ දෙමාපියන් විසින් කලාප අධ්‍යාපන අධ්‍යක්ෂවරයා දැනුවත් කර ඇති අතර එම නිළ ඇඳුම් රැගෙන ගිය ත්‍රීවිලයේ තොරතුරුද පොලිසිය වෙත ලබා දී ඇත. පාසල් නොමැපැමිණි දුප්පත් දරුවන්ගේ නම් වලට පැමිණිම සටහන් කර මෙසේ නිළ ඇඳුම් වංචා කර ඇති බව තහවුරු කර ගෙන තිබේ. විදුහල්පතිනිය තව දුරටත් පාසලේ විදුහල්පති ලෙස සේවය කරන අතර උප ගුරු මහත්මියක් ඇතුළු කුකුළු ගොල්ල විදුහලට මාරුවී ගොස් ඇත. අනෙක් උපගුරුතුමිය පරික්ෂණ සිදු කරන අතර තුර විශ්‍රාම ලබාගෙන ඇත. විදුහල්පතිනිය කුරුණෑගල කලාප අධ්‍යාපන අධ්‍යක්ෂවරයාගේ නිර්දේශයක් මත වෙනත් පාසලකට මාරුකර විධිමත් පරික්ෂණයක් කිරීමට නියමිත බව අමාත්‍යවරයා පැවසීය.