සූරිය කන්ද හේයස් වත්තේ අටසියයක් වැඩ වරයි

සූරිය කන්ද හේයස් වතුයායට අයත් ඉඩම් අක්කර 100 ක් පුද්ගලයින් 4 දෙනෙකුට බෙදා දීමට එරෙහිව විරෝධය දක්වමින් හේයස් වතුයායේ කම්කරුවන් අටසියයක් පමණ ඊයේ (09) සිට සේවා කට යුතුවලින් ඉවත්ව සිටී. සිංහරාජ ලෝක උරුම වනාන්තරය අසල පිහිටි සූරියකන්ද හේයස් වතුයායට අයත් තේ කම්හලක්ද මේ තත්වය නිසා දෙදිනක් තිස්සේ වසා දමා ඇති අතර තේ දළු නෙලීම ආදී සියලු කටයුතු ඇන හිට තිබේ. සතියකට පමණ පෙර මේ වතුයායට අයත්ව තිබූ මුඩුබිම් අක්කර සීයක් ඉඩම් ප්‍රතිසංස්කරණ කොමිෂන් සභාව මගින් බෙදා වෙන්කොට අක්කර 25 බැගින් සිව් දෙනෙකුට පවරා ඇති බවට චෝදනා කිරන කම්කරුවන් පරම්පරා ගණනක් තමන් ජීවත්වන භූමිය බාහිර පුද්ගලයින්ට දීම පිළිබඳව විරෝධය දක්වයි. කොලොන්න පොලිසිය වතුයායට ආරක්ෂාවද සපයා තිබේ.