නිවාඩු නිකේතනයේ වෙඩි තැබීමක්

කෑගල්ල රංවල ප්‍රදේශයේ පිහිටි නිවාඩු නිකේතනයක ඊයේ (10) අලුයම සිදු වූ වෙඩි තැබීමකින් බරපතල තුවාල ලැබූ විසි හතර හැවිරිදි තරුණයෙකු රෝහල් ගත කර ඇත. වෙඩි වැදීමට ලක් වූ තරුණයා එම නිවාඩු නිකේතනයේ සේවය කළ අයෙකු වන අතර ඔහු කොළඹ ප්‍රදේශයේ පදිංචිකරුවෙකු බව අනාවරණය වී තිබේ. නිවාඩු නිකේතනයේ සේවය කළ තරුණයින් තිදෙනෙක් එක්ව අලුයම දෙක පමණ වනතෙක් මත්පැන් පානය කර තිබූ බවත්, ඉන් පසුව ඔවුන්ගෙන් දෙදෙනෙක් එක කාමරයකත් අනෙකා තවත් කාමරයකත් නිදාගත් බවත්, පාන්දර 6.30 ට පමණ අල්ලපු කාමරය දෙසින් වෙඩි ශබ්දයක් ඇසී ගොස් බලද්දී තම මිතුරා ගල්කටස් වර්ගයේ ගිනි අවියකින් වෙඩි තබාගෙන සිටි බවත් තුවාලකරුගේ මිතුරා පොලිසියට ප්‍රකාශ කර තිබේ. හෝටල් කාමරයෙ තිබී ගල් කටස් වර්ගයේ තුවක්කුව කෑගල්ල පොලිසිය මගින් අත්අඩංගුවට ගෙන තිබෙන අතර තුවාලකරු කෑගල්ල රෝහලින් මහනුවර රෝහලට මාරු කර යවා තිබිණ. කෑගල්ල පොලිසිය වැඩිදුර පරික්ෂණ පවත්වයි.