අත්තිඩියේ හෝටලයේ කුණු වතුර වළක ගිලී දෙදෙනෙක් මිය ගිහින්

අත්තිඩිය, බේකරිය හන්දියේ හෝටලයකට අයත් භූගත අපද්‍රව්‍ය පිරී තිබූ ටැංකියක් පිරිසිදු කරන්නට ඒ වළට බැස්ස පුද්ගලයන් දෙදෙනෙක් විෂ වායු වැදීමෙන් ජීවිතක්ෂයට පත් වී තිබේ.  ඊයේ (06) රාත්‍රී 11.30 ට පමණ මෙම සිද්ධිය වී ඇත. මෙම හෝටලය මීට වසරකට පමණ පෙර බද්දට ගෙන ඇත්තේ ආර්. යෝගරාජන් නැමැති ව්‍යාපාරිකයෙකි. හෝටලයේ මුළුතැන්ගේ සිට පිටුපස පිහිටි මෙම භූගත අපද්‍රව්‍ය ටැංකියට, අපවිත්‍ර ජලය රැගෙන යාමට තිබූ බටයේ කුණු හිර වීමෙන් ජලය බැස යාම ඇණහිට තිබේ.

ඊයේ රාත්‍රියේ එම බටයට කම්බි දමා පිරිසිදු කරන්නට දැරූ උත්සාහය සාර්ථක වී නැත. ඒ නිසා භූගත ජල ටැංකිය ඇතුළට බැස ඊට සම්බන්ධ වී තිබෙන බටය පිරිසිදු කරන්නට හෝටලයේ සේවකයින් දෙදෙනෙක් සූදානම් වී තිබේ. එම අවස්ථාවේ ඔවුන්ට මෙම ටැංකියට නොබසින ලෙසට යෝගරාජන් නැමැති ව්‍යාපාරිකයා විසින් අවවාද කර ඇතැයි පැවසේ.

එහෙත් පළමුව එක් සේවකයෙක් වළට බැස ඇත. සුළු මොහොතක දී විෂ වායුව වැදීමෙන් ඔහු වළ තුළ පිහිටි අපද්‍රව්‍ය ජලයට වැටී ගිලී තිබේ. ඔහුව බේරා ගන්නට තවත් සේවකයෙක් වළට බැස ඇති අතර ඔහුද සිහි නැති වී වළ තුළට වැටී තිබේ. ඔවුන් දෙදෙනා බේරා ගන්නට තවත් සේවකයෙක් වළට බසිද්දී ඔහු ද සිහිසුන් වී ඇති අතර කඹ දමා මහත් අසීරුවෙන් ඔහුව බේරා ගෙන ඇත. මේ වන විට එම සේවකයා කළුබෝවිල මහා රෝහලේ ප්‍රතිකාර ලබයි.

මියගිය පුද්ගලයින් දෙදෙනාගේ සිරුරු අද (07) පෙරවරුවේත් එම වළ තුළම තිබිණ. සිරුරු ගොඩ ගන්නට පොලිසිය හා ප්‍රදේශවාසීන් බලවත් උත්සාහයක යෙදී සිටී. මියගොස් ඇත්තේ මැටිගහතැන්න, ලැයිමවත්ත, අංක 5 දරණ ස්ථානයේ පදිංචි 33 හැවිරිදි පෙරුමාල් සුන්දරසම් සහ ආගරපතන, බැල්මෝරල් වත්තේ පදිංචි 32 හැවිරිදි රාජේන්ද්‍ර යෝගකුමාර් යන අය බව හඳුනා ගෙන තිබේ.